كم مرة سمعت أحدهم عم يقول: “عملنا براندينغ جديد للشركة” وبتكتشف إنه كل اللي عمله هو إنه غيّر لون اللوجو من أزرق غامق لأزرق أفتح شوي؟! طبعاً النتيجة؟ مبيعات صفر، وشغف للركب.
تعالوا نفكك القصة بأسلوب بسيط ومن دون تنظير ووجع راس
اليوم رح نحكي بموضوع مجنّن نص أصحاب الشركات، ومخلّي النص الثاني يصرفوا ميزانياتهم على أشياء ما لها طعمة: شو الفرق بين البراند (Brand) والبراندينغ (Branding)؟
أولاً: شو يعني براند (Brand)؟
خليني بسّطلك ياها. البراند هو السمعة، الأثر اللي بيتكون بذهن الزبون لما يسمع اسمك. يعني وعلى بساط أحمدي:
-
البراند مو اللوجو تبعك
-
ولا الكرت الشخصي الفخم حتى لو طابعه ڤارنيش مقشش
-
ولا صفحة سوشال ميديا فيها 100 ألف متابع وهمي
البراند هو شعور الزبون وهو عم يتعامل معك. لما أحدهم يسأل عن شركتك والجواب يكون: “جماعة فهمانين بشغلهم”.. هاد هو البراند تبعك! أما إذا قاله: “نصيحة لا تتعامل معهم”.. للأسف، هاد كمان هو البراند تبعك!
شوف هذا الفيديو عن الموضوع، وارجع لنتابع كلامنا 🙂
ثانياً: شو هو البراندينغ (Branding)؟
إذا كان البراند هو السمعة، فالبراندينغ هو العملية والمجهود اللي بتعمله لحتى تبني هي السمعة.
البراندينغ هو الفعل، الاستراتيجية، الألوان، الخطوط، النبرة اللي بتحكي فيها، الهوية البصرية كاملة، والطريقة اللي بترد فيها على الرسائل (مو تبع “تم الرد في الخاص” الله يرضى عليك).
اختصار ع السريع: > * البراندينغ: هو شو بتعمل وشو بتحكي عن حالك.
البراند: هو الناس شو بيفهموا وشو بيحكوا عنك من ورا ظهرك.
طيب ليش عم تخلطوا بيناتهم؟
لأن معظم الناس مفكرة إنك إذا دفعت كم دولار لواحد يعملك “لوجو” على السريع، فأنت هيك صرت عمات “براند” ومنافس لشركات عالمية!
الحقيقة؟ الهوية البصرية هي مجرد رأس الجبل الجليدي. إذا ما كان وراه استراتيجية صح، وهوية بصرية متكاملة بتعكس قيمتك الحقيقية، أنت عم تسوي بوليش لسيارة خربانة موتورها محروق.
بصفتي خبير ببناء الهويات البصرية والبراندات (يعني هاد شغلي اللي باكل منه خبز وبعرف خباياه صح)، بشوف يومياً شركات عندها منتجات بتجنن، بس محروق كرتها في السوق لسبب واحد بس: البراندينغ تبعهم ضايع، وبالتالي البراند تبعهم مشوّه.
كيف تبني براند صح وما تضيع مصاريك؟
-
اعرف حالك قبل ما تعرف السوق: مين أنت؟ شو قيمتك؟ وليش الناس لازم تشتري منك مو من غيرك؟
-
الاستثمار بالهوية البصرية الاحترافية: لا تسترخص بالهوية، الهوية مو بس ديزاين حلو، الهوية هي اللغة البصرية اللي بتخلي الزبون يثق فيك قبل ما يجربك.
-
الثبات والاستمرارية (Consistency): مو كل أسبوع تغير ألوانك ونبرتك حسب مزيج الجو.
كلمة أخيرة من مهند..
إذا حابب تبعد عن التخبيص وتبدأ تبني علامة صح تحكي عن حالك وتجيبلك نتائج حقيقية مو بس “لايكات”، فكّر بالقصة كاستثمار طويل الأجل مو مجرد تصميم حلو.
إذا حابب تسمع مني نصائح سريعة، وتحليلات ع الماشي للهويات البصرية والبراندات، مرّ على حسابي على إنستغرام أو قناتي على يوتيوب وخلّينا نضل على تواصل:
👉 حسابي على الإنستغرام: www.instagram.com/mahayni
نشوفكم بالبوست القادم، وبدون تخبيص بالبراندينغ لو سمحتوا!
